Kua nkangu a Kongo wa wonsono,
Ba mbuta bau vo : ku mfinda mazu ma nti wu buanga imawakananga nga mo ma vayikilanga e vo ma butukilanga e nti ka ma wakananga ko.
Tu zibula meso.
Tueti sikidisa dimosi vo : momo Congo dia nene besi Kongo yi nkila mpuku kaka beti vewa. Mpele ko kongo dia kati weti vana kiuma kia mbongo kansi luzitu nkatu.
Kongo dia kati weti vana fuani kia 30 % mu ndiatisulu a luyalu lua nsi a Congo kansi nkutu muna luyalu ntumi ya kongo yi mosi kaka e vo zi zole.
Inga ye SNEL beti sala kisalu tuka muna tuka. Kansi mbongo ka zi monekanga ko. Muna 100 KW ya "courant" yeti vayika ye tekua buna mbongo za 35 KW kaka zeti kota mu nkesi mia leta. Yandi mbongo za 65 KW kueyi zi kuendanga ????
Buna tu kuenda tala pitiloya dieti bakua kuna Mbanza Muanda, va nkatu muntu wena ye kia mu songa a kua ba bakanga ye mpe kua ba tekanga, ye mpe mbongo bueyi zisaduluanga ye mpe nki zi saduluanga.
Muna Nzila Matadi, basadidi bifulu bifuete bakulua mbongo kua nkaminio zeti sadila nzila. Dia kiadi kaka vo ndundu ya Malta Forrest yandi weti diengisa tuka yandi Gouverneur na ye ntuadisi a Kimvuka kia ma duki masolua mu nsololo Tata Matuiku Kimasi, wa teza mu nuana kansi bu kiena vo beto kibeni katuena kueto ye vema ko, ka tuena kueto ye kikesa ko mu songa kua mfumu za luyalu vo nsadulu kingadi katuzolele yo ko. Buna tueti toma sakananua ye sevua.
Nzila kuna kongo za ntoto ye ntoto, mavata mankaka buna bamana sala bilanga ka bazeye ko bueyi bena tekela bima bina basadidi.
Mavata ma kongo vila ye vila meti vila, kadi zi ntuenia za wonsono, beti mana kuenda mu mbanza za makompani, muna ma gata mafola ye mafola kaka meti mana sala.
Kuna Kongo, nzo za nkanda,, tupitalu, nzo za kitadi ye zi fundusuluanga mambu yi za sisa fualama kaka zele kadi momo ma gata meto.
Kuna kongo kisukami kisakidi, mpasi zi wokele. Tutomene zaya vo mpasi vo zisakidi bisalu bia tombe mpe bi wokele. Kindoki, kimpala, kingiangia ye bonso bobo.
Tuka kuna Singini, lutila vana Luozi, nda nani kuaku nate ye kuna Lukunga, teza vunda vana Kivulu bosi wu kuenda tula kuna Ngindinga, baluka kuaku kuna Kimvula ye nza bua kuna Ngufu, mpimpa vo yi buidi, nsuasuani ya tombe kia bilungi nkatu. Kuna nkutu ngatu si kua kala fi kia fia tiya widi tiya tukalanga kuna. Kuna Kongo yi pipidipi. Muna mbanza zi za baka lau dia baka yandi muinda "courant" kolo kia ba fualama, isa vo fulu bia nkaka ndondo wena ye muinda mazi si katoma mona beni.
Buabu yandi pitiloya, yandi makompani mena kuna kongo, yandi "ports" za Boma ye Matadi mbongo zi kotanga koko nga nki zi salanga, banani ba dianga zo.
Bakongo tu fuete zibula meso kadi tuena ye luve ye yakiyaki dia yuvula makalaka ye ntuadisi mia nsi ya Congo bueyi nsi yeta diatusulua.
Kadi kolo nkangu a Kongo wena mu kingongo kia mpasi, kolo nkangu a Kongo weti zina ntima lembua kua zaya bueyi mbazi si ya luaka vo nkatu. Bankaka beti vuama mu mbongo za Kongo.
Idina konso konso muntu nduna luengele fioti ye wena ye kimpuanza kia vova ye siamisa nkangu ka fuete telama ye tula wonga ku ngenga musonga kua mfumu za luyalu vo mambu momo ye nsadulu zozo kazilendi tatamana ko.
Katulendi nkutu kala ye wonga ko mu songa nzila za wonsono vana meza : Vo katu muene kia ko wana kuvambana kaka.
Longo nkutu kansi vo mabanza kameta bakana ko fua lu fuanga. I dina mono mbakidi kimpuanza kia songa kua beno mpangi zame, tu fuete telema ye zibula meso. Songa kua mfumu za luyalu vo katuena ye mabanza ma sekuka mu Congo ko kansi tueti zola mona kia mu ndiatusulu a nsi eto. Vo nkatu buna tu fuete nuana vita diodio dia sekuka ye diatisa nsi eto beto kibeni kadi nkia salu kia kondua nluta. Kongo dia kati weti vana bima bingi, mbongo za zingi kansi nki keti baka ku nima :, luyanu, lusakananu, lufua.
Mu fokola, tu fuete telama mu sima fu kiokio kia luyalu kieti tatamana mu fila ma soda mu kuenda vonda besi Kongo muna zi mbanza zau, mavata mau bonso bibulu.
Nzeye vo tuena yi mintuadisi bonso tata Mbati Mbatsa, ye Tata Kimasi kansi nkutu edi kaka vo lusuasuanu luena va kati kua : mfumu ye kimfumu. Mbuta zozo ye bankaka yi zi mfumu kuani kansi nkutu kabena kuawu ye kimfumu ko.
Buna Muana nkongo fuete telama ye vuata kikesa mu kuata kimfumu kiokio.
Mfumu za luyalu bafuete zaya vo nkongo ka nianga ya ngiangila ngoma ko.
Mu baka luzitu,
Tukatuleno wonga
Ye nuana mvita yayi beto kibeni
Vo bua ma bua ma bua.